बारीक केस कापा.

* उपदेश फक्त मुलांसाठी.

केस एकदम एकदम बारीक कापा. खूपच बारीक, अक्षय खन्नासारखे कापले तर उत्तम.

कारण - खूप जबरी आहे हां.

एकदम बारीक केस कापले की, दाढी वाढलेली लगेच लक्षात येत नाही.

मी बारीक केस कापल्यावर, इतर वेळेला, ४-५ दिवसानींच दाढी कर दाढी कर, असे मागे लागणारे लोक, दीड आठवडा झाला तरी गप्प - आज लक्षात आले यांच्या.

*

मजा करा.

लहान मुलांशी कनेक्ट होण्याचे दोन सोप्पे मार्ग म्हणजे:

१. गोष्टींची टिंगलटवाळी.

२. घाण बोलणे.

उपदेश: दोन्ही आचरणात आणा व मजा करा.

उदा:

मी व माझ्या मुलाने बनवलेली वाक्ये:

आपला मराठी बिग बॉस - आपला गावठी चिली सॉस

संगीत सम्राट, सा रे ग म प - रंगीत चपराक, (गालावर हात ठेवून) अ, आ, इ, ई

तुझ्यात जीव रंगला /चालतयं की - दुधात टोस्ट भिजला, चावतयं की.

कुंकू, टिकली आणि टॅटू - लाडू चकली आणि कडबू

लक्ष्मी सदैव मंगलम - पक्षी सदैव जंगलम

काढा चड्डी, सोडा नळ - शी चोवीस तास (आम्हाला माहिते, दोन चॅनलचे मिक्स आहे)

उघडा फ्रीज, ढापा नीट - काजू माझा

एखादे वाक्य घेवून जोरजोरात म्हणत बसायचे, १५-२० मिनीटे तरी आरामात हसण्यात जातात.

 *

विश्वास.

जर ( तुम्ही धार्मिक असाल तर)

अ = देव

जर (तुम्ही धार्मिक नसाल तर)

अ= विज्ञान

धार्मिक+वैज्ञानिक, निम्मंनिम्मं अशा कॉम्प्लेक्स केसेस नाही हाताळल्यात सध्या. 

(कारण? कारण आपले जग हे बायनरी होत चालले आहे, आणि टायपिंगचा आळस.)

उपदेश:

"अ"वर आणि कंपायलरवर विश्वास ठेवा. त्यांच काम खूप मोठ्ठं आहे, छोट्याछोट्या बग/अडचणींसाठी या दोघांना शिव्या घालू नका. ९९ % वेळा अ आणि कंपायलर बरोबरच असतात.

(ॲक्च्युअली, विज्ञानाला घातल्यात तरी चालेल. स्पेशली मायक्रोबायोलॉजिस्ट, डॉक्टर, गोळविलकर लॅब, वगैरे जेपण कोण जबाबदार आहेत ते, त्यांना- 

माणूस चंद्रावर गेला, अंतराळात ISS बांधलं, पण यालोकांना अजून लगेच सर्दी-खोकला जाईल अशी एक गोळी नाही बनवता आली? काय अर्थ आहे का? 

विज्ञानाकडे सगळी उत्तरं असतात म्हणे, शेंबडावर काय उत्तर आहे?)

*

नोटीव्हेशनल

मोटीव्हेशनल पुस्तकं वाचलीत तर त्यातले सल्ले स्वत: हवे तेवढे पाळा - कृपया लोकांना समजावू नका, लोकांना महाबोर होते हो.

चहा-लिमीट

सलग तीन चहा (का चहे?) पिऊ नयेत.

(बाकी काही प्रॉब्लेम नाही, चौथा प्यावासा वाटतो मग, किती पिणार हो असे?)

*

मिडलईस्टमधे राहण्यापेक्षा पाकिस्तानात राहणे परवडले.

मिडलईस्टमधे राहण्यापेक्षा पाकिस्तानात राहणे परवडले.

जी काय परिस्थिती आहे त्यातला आनंद शोधा आणि सुस्कारे टाका पण सुखी रहा.

*

कधी कधी खोटे बोलावे लागते.

आयुष्यात कधी ना कधी खोटे बोलावे लागतेच. न कचरत बोला. हे बर्‍याच जणांनी पूर्वी सांगितले आहे मीसुद्धा सांगतो. लोभ असावा.

उदाहरणार्थ, आज मंडईत कांदे घेताना, त्या मावशींनी, सुट्टे नाहीत का? असे विचारले. माझ्याकडे होते पण मी नाहीत म्हणालो कारण, कांदेबटाटे घेताना बंदे रुपयेच द्यायचे असतात असा एक अलिखीत नियम आहे. (आले का परत अलिखीत नियम).

 शिवाय मला पुढे कोथिंबीरीला सुट्टे लागणार होते. 

शिवाय++ त्या मावशींच्या पोत्याखाली चिक्कार सुट्टे पैसे दिसत होते.

अशी सगळी कारणमीमांसा असताना, खरे बोलायचे म्हणजे, त्यांना ही सगळी कारणे सांगून, म्हणून मी तुम्हाला सुट्टे पैसे देवू शकत नाही असे म्हणावे लागले असते. काय अर्थ आहे का?

आपला युधिष्ठीर हिरो, कधी मंडईत गेला नसेल.